കുമ്പിളിലൊരമ്പിളി

മഞ്ഞുമേലാപ്പ് വിട്ടിങ്ങു പോരൂ

കുഞ്ഞുപിഞ്ഞാണ പൊയ്ക നീട്ടുന്നൂ,

ഇങ്ങു തെങ്ങിൻ തലപ്പുവരെയെത്തീട്ടു

പൊങ്ങി മാനത്തെ പഞ്ഞീലൊളിക്കല്ലേ.

വെള്ളക്കൂട്ടിലൊളിപ്പിച്ചു വച്ചൊരാ

തള്ളമുയലും തുള്ളും കിടാങ്ങളും,

ആർത്തുതിമിർത്തന്നു മാഞ്ചോട്ടിലെ-

പ്പാർത്ത കൂരയിലൊത്ത് കളിക്കുവാൻ.

മാമു കുഴയ്ക്കുമ്പോൾ ഉപ്പുകൂട്ടിട്ടൊട്ടു

പൊള്ളിച്ച പപ്പടമേന്തിയെടുത്തിട്ടും

ഇത്തിരി നെയ്യു തൂവിയിട്ടെപ്പോളു-

മെന്നമ്മ ഉരുട്ടിയോരുരുളകൾ കട്ടിടാൻ.

ചായുറങ്ങുന്നേരം കിളിവാതിലോരത്ത്

പേയുറക്കാത്ത പൊള്ളും കിനാക്കളെ

പണ്ടു പണ്ടൊരു രാജ്യത്തെ കഥകൊണ്ടു

വീശി വീശി തണുപ്പിച്ചടക്കുവാൻ.

മഞ്ഞുമേലാപ്പ് വിട്ടിങ്ങു പോരൂ

കുഞ്ഞുപിഞ്ഞാണ പൊയ്ക നീട്ടുന്നൂ,

മുങ്ങിയെണീറ്റെത്തി കുമ്പിളു കവരണം

മങ്ങിയ രാവിന്റെ അമ്പിളിച്ചിരി...

                                                                                                                        --സുഭാഷ് പൊതാശ്ശേരി--